LAOAG CITY – Natay ti maysa kadagiti lima nga indibidual a nakimat iti Sitio Cadalayapan, Brgy. Nagpatpatan, Solsona, Ilocos Norte.
Nabigbig ti pimmusay a ni Bong Valera, naasawaa ken residente iti Brgy. Catangraran iti nasao nga ili idinto a dagiti nakalasat iti insidente ket isuda Melencio Juan, Vick Malaqui, Orlinio Tamayo ken Robert Balisacan, agpapada a naasawaan ken agpapada a residente iti Brgy. Nagpatpatan.
Segun kenni Police Captain Randy Damo, chief of police ti Philippine National Police iti ili ti Solsona, nakaawat da ti report nga adda ti nakimat ken iti panagresponde da ket nakita da dagiti nakadasay a biktima.
Inlawlawag na nga iti panagimbestigar da, kalkalpas ti panagtataripnong dagiti biktima ngem gapo iti panagtudo ket naglinong dagitoy iti kubo-kubo agingga a naggurru-od ken nagkimat.
Inbatad na a basar iti impormasyon da ket rumrumuar nga ummuna a timmama ti kimat iti kakawayanan agingga a timmama kadagitoy.
Kunana nga iti palawag dagiti dadduma a biktima, kalpasan a timmama kadakuada ti kimat ken naipurwak da ken nagbibineg ti saksaka da idinto a ni Valera ket naawanan ti puot.
Naitaray dagiti biktima iti Rural Health Unit iti ili ti Solsona ngem naideklara ni Valera a dead on arrival gapo iti Electrocution secondary to lightning.
