LAOAG CITY – Natay ti maysa a lakay kalpasan ti panagdinnungpar ti maysa nga elf truck ken maysa nga motorsiklo iti Solsona-Apayao road, Brgy. Manalpac iti ili a Solsona.
Nabigbig ti biktima a ni Segundino Laureta Sr., agtawen ti 75, driver ti motorsiklo, maysa a mannalon, ken residente iti nasao a barangay ken lubbon na ni Barbito Dacilag, agtawen ti 49, ken residente ti Brgy. Buttao, Calanasan, Apayao.
Segun ti imbestigasyon ti PNP Solsona, agpapadaya a direksyon ti elf truck nga inturong ni Fregin Alejo, agtawen ti 49, ken residente ti Brgy Manalpac ken ti motorsiklo nga inturong ni Laureta.
Kelaat a naglikko ti motorsiklo iti kannawan ken aksidente a nasapgud ti elf truck a sumarsaruno.
Gapu iti daytoy, nasugatan dagiti nakalugan ti motorsiklo ken insegida a naitaray da iti ospital ngem naideklara a dead on arrival ni Laureta.
Nagtalinaed ni Daquilag iti ospital para ti naan-anay a pannakataming na idinto a ti driver ti truck ket nagtalinaed iti kustudyar ti PNP.
