LAOAG CITY – Maysa ti natay idinto a maysa met ti natukkol ti saka na kalpasan ti desgrasya iti Brgy. Suyo iti ili ti Dingras.
Binigbig ni Police Capt. Joseph Calderon, hepe ti PNP Dingras, dagiti karaman iti aksidente a da Meliton Alipio Domingo, driver ti kurongkurong, agtawen ti 48 ken residente iti Brgy. Lagui Sail ditoy siudad ti Laoag ken ti driver ti motorisklo ket ni Deus Mel Agustin Tamayo, agtawen ti 23, ken truck driver.
Segun kenni Calderon, pimmusay bayat a matamtaming iti Dingras District Hospital ni Domingo idinto a ti maysa kadagiti pasahero na ket nagsagaba ti sumagmamano a sugat ken saan a naan-ano ti maysa pay a pasahero na.
Naiyakar met iti Mariano Marcos Memorial Hospital and Medical Center iti siudad ti Batac ni Tamayo gapu ti sinagaba na a nakana a sugat ken natukkol ti akin kannawan a saka na.
Inbatad ni Calderon a maipagarup a nataray ti motorsiklo a nangitunda ti pannakakuppit ti tangke iti motorsiklo ti kurongkurong.
Rumrumwar na a ti kapigsa ti panagdinnungpar da ket nagpuligos ti kurongkurong idinto a maipagarup a saan met a nakapagpreno motorsiklo gapu ta awan ti nakita da nga skid mark iti kalsada.
Kuna ni Calderon, a rumwar ti kurongkurong iti highway ken agturong iti laud idinto a ti motorsiklo ket agpadaya a direksiyon.
Inbatad na a naggapu iti trabaho ti nakamotorsiklo gapu ta maysa a truck driver ken maipagarup a nagovertake ngem naklaat gapu iti iseserrek ti kurongkurong iti highway rason a nagdinnungpar da.
Agtultuloy pay laeng ti imbestigasyon dagiti otoridad kalpasan ti nakaam-ames a desgrasya.
