LAOAG CITY – Maysa ti natay idinto a tallo dagiti nasugatan, pakairamanan ti suspek iti napasamak a pammagkong iti maysa a pasken iti paset ti Barangay 1, San Francisco, San Nicolas, Ilocos Norte.
Nabigbig ti natay a ni Romeo Domingo Jr., agtawen iti 50, naasawaan, dati a kagawad idinto a nasugatan ti anak na a ni Jake Clarence Domingo, agtawen iti 24, addaan ti live-in partner, maysa a constraction worker, kasta pay ti agnagan ti Ismael Sese Jr, agtawen iti 26, maysa a constraction worker ken ti suspek a ni Celedonio Dony Saturnino, agtawen ti 38, agpapada dagitoy a residente iti nasao a barangay.
Segun iti inisyal nga imbestigasyon ti PNP-San Nicolas, bayat dagiti maseknan iti balay ni Wilson Pasague gapu ta adda ti pasken ket naaddaan da ti nabara a diskusyon a nangitunda ti panangbagkong ni Saturnino ken ni Romeo Domingo.
Ginandat ni Sese ti aganawa ngem nairamraman daytoy a nabagkong a nagsagabaan na iti dua a sugat iti bukot na.
Inbatad ti PNP a possible a rimmaman met ti anak ti biktima a ni Jake Clarence Domingo a rason ti nakabagkungan kenkuana ni Saturnino.
Naamoan a nasugatan met ti suspek kalpasan nga inpang-or ti agnagan ti Noel Garcia ti bote ti arak kenkuana kabayatan iti insidente.
Naitaray ti ama a Domingo iti Laoag City General Hospital (LCGH) ditoy ciudad ti Laoag ngem naideklara a pimmusayen idinto a ti anak a Domingo ken ni Sese ket napaagasan da iti Governor Roque Ablan Senior Memorial Hospital ditoy ciudad ti Laoag ken ti suspek ket naipan iti Mariano Marcos Memorial Hospital and Medical Center iti ciudad ti Batac.
