LAOAG CITY – Saanen a naidanon a sibibiag ti maysa a lalaki iti Rural Health Unit (RHU) iti ili ti Solsona kalpasan a naitaray daytoy gapu iti pannakdisgrasya na.
Nabigbig ti pimmusay a ni Armando Lanic agtawen iti 47, ken residente iti Bgy. Puttao iti nasao nga ili.
Iti imbestigasyon ti PNP Solsona, nakalugan ti biktima iti motorsiklo na ket aksidente a nakidinnungpar iti maysa a kurongkurong a nagluganan ti maysa a pamilya.
Nabigbig dagiti nakalugan iti kurongkurong a da Julie Domingo, agtawen iti 37, naasawaan, maysa a mannalon, ti asawa na a ni Glenne Rose, agtawen iti 37 ken ti agnagan iti Jaypee Martinez nga agtawen iti 11, agpapada a residente iti Bgy. Francisco iti ili ti Dingras.
Napasamak ti aksidente iti paset ti Bgy. Nagpatpatan iti ili ti Solsona.
Agtultuloy pay laeng ti imbestigasyon iti nasao nga aksidente.
