LAOAG CITY – Maysa ti natay idinto nga uppat dagiti nasugatan iti pannakadesgrasya ti maysa nga owner type jeep iti paset ti Barangay Baay idiay ciudad ti Batac.
Binigbig ni Police Senior Inspector Dionisio Baldillo, ti deputy chief of police iti PNP-Batac ti natay a ni Rizal Corpuz Jr., nangiturong ti owner jeep, idinto a saanen a nabigbig pay dagiti uppat a nasugatan.
Inbatad ni Baldillo nga iti imbestigasyon da, agdaldalyasat dagiti biktima iti national highway ken idi nakadanun da iti agkurba a paset ti kalsada ket napukawan ti kontrol iti manibela ni Corpuz a nangitunda ti pannakaidungpar da iti maysa a poon ti kayo.
Gapu ti kinapigsa ti pannakaidungpar dagiti maseknan ket nagsagaba ti sugsugat ni Corpuz ken dagiti uppat a kadwa na iti lugan.
Naitaray a dagus dagiti maseknan iti ospital ngem naideklara ni Corpuz a dead on arrival, dagiti dua ket nagtalinaed da a maag-agasan idinto a dagiti dua pay ket nakaawid dan gapu ta gasgas laeng dagiti sinagaba da.
Kinumpirmaran ni Baldillo a nakainom dagiti maseknan gapu ta rumrumuar a naggapo dagitoy iti paggiinuman iti Barangay Billuca iti met laeng nasao a ciudad.
