LAOAG CITY – Umaboten iti 2,946 ti kaso ti covid-19 ditoy probinsya idinto a 41 dagiti pimmusay gapu iti nasao a sakit.
Daytoy ket kalpasan a nairekord ti 45 a baro a kaso ken maysa a death case.
Basar iti inparuk-at a datos ti gobienro probinsya, kaadoan ti nairekord a kaso ditoy siudad ti Laoag nga umabot iti 26.
Sumaruno ditoy ti ili ti Bacarra a nakairekord ti pito a kaso; Paoay ket tallo; Batac ken Sarrat ket dua idinto nga agpapada a nakairekord ti saggaysa a kaso iti ili ti San Nicolas, Pagudpud, Pinili, Sarrat, Adams ken Bangui.
Kabayatanna, ti maika-41 a pimmusay gapu iti virus ket ni IN-C2861, agtawen ti 62 a lakay ken residente iti Brgy. 49-B Raraburan ditoy siudad.
Iti agdama ket adda ti 373 nga aktibo a kaso ti covid-19 ditoy probinsya idinto a nagtalinaed a 2,532 dagiti nalaingan kalpasan nga awan ti nainayun a recoveries.
Agtultuloy ti ballaag ti gobierno probinsya iti panangsurot kadagiti pagalagadan kontra ti covid-19 tapno maliklikan ti panagwaras ti virus.
