LAOAG CITY – Kinumpirmaran ni SPO2 Lumiowel Bolusan, ti chef investigator iti PNP idiay Pagudpud, Ilocos Norte ti pannakatiliw da ti maysa nga Isuzu Cargo Truck a nagkarga kadagiti naririt a tarikayo iti inyuswat da a checkpoint iti Barangay Ligaya iti met laeng nasao nga ili.
Binigbig na ti nangiturong ti truck a ni Ferdinand Cabotaje y Gacho, agtawen iti 41, naasawaan ken residente iti Brgy Namuac, Sanchez Mira, Cagayan idinto a ti kadwa na ket ni Federico Segundo y Lagundino, agtawen iti 37, naasawaan ken residente met iti Brgy Gatto, Pamplona, Cagayan.
Inbatad ni Bolusan nga inadmitir Cabotaje nga awan ti lisensya na nga agmaneho ken awan dagiti naipakita na a dokumento dagiti kinarga da a naririt a tarikayo.
Segun kenkuana, ti nasao a truck ket aggapo idiay Cagayan ken dagiti lumber ket kukua ni Mrs. Josie Galapia a residente iti Centro, Sanchez Mira, Cagayan, ken maideliver daytoy idiay San Fabian, Pangasinan.
Kinumpirmaran ni Bolusan a dagiti naririt a tarikayo ket mapatta-patta nga agbalor iti nasurok a 40 a ribo a pisos.
Gapu ti daytoy, kuna ni Bolusan a pilaan da iti panaglabsing iti Presidential Decree 705 wenno illegal logging da Cabotaje, Segundo ken ti agtagikua kadagiti lumber a ni Galapia.
