LAOAG CITY – Dinaydayaw ti maysa a gangannaet a turista ti kinatalna, kinapintas ken kinadalus ti Ilocos Norte ken ti kinamanagsangaili dagiti Ilocano.
Segun ken ni Mrs. Cara Brooks, residente idiay Singapore, daytoy ti kaunaan a gundaway nga immay nagpasiar ditoy Pilipinas kaduana ti asawana ti anakna ken ti katuganganna a babai.
Mainaig iti daytoy, impeksana ti napalaus a panagyamanna iti gayyem ken kaopisinaanna idiay Singapore a maysa nga Ilocano a ni Miss May Rose Ancheta a taga Brgy Pila ditoy siudad ti Laoag a nangawis kenkuana nga immay nagbakasyon ditoy Ilocos Norte.
Imbatadna a nagbalin a naragsak ken napnek da iti lima nga aldaw a kaadda da ditoy probinsia.
Inbunannagna a karaman kadagiti binisita da dagiti daan a simbaan ken beaches.
Siraragsak ni Brooks a nangipalgak a magustoan ti anakna ditoy probinsia ken kayatna nga agpaut pay dagitoy.
Mainaig iti daytoy, kunana nga inkarina iti anakna nga agsublinto manen dagitoy iti masungsungad nga aldaw.
