LAOAG CITY – Natiliw ti maysa a waiter iti naiyuswat a drug buy-bust operation iti Barangay 1, Discolandia ditoy ciudad ti Laoag.
Nabigbig ti suspek a ni Prince Carlo Corpuz, agtawen iti 21, baro, waiter iti Earth Quake Disco ken residente iti Barangay 4 ti nasao a ciudad.
Segun ti PNP-Laoag, ni Corpuz ket dati a drug surrenderer ngem nagsubli manen iti illegal na aktibidad na ken adda iti Street Level Target (SLT) ti ciudad.
Ni Corpuz ket maipagarop a naglako ti maysa a sachet a naglaon ti maipagarop a shabu iti maysa a pulis a nagpammarang a poseur buyer.
Naamoan nga iti panangkapkap dagiti pulis ken ni Corpuz ket nakakumpiskar da pay ti maysa a sachet a naglaon ti maipagarop a shabu, sangaribo a pisos a nausar iti operasyon, lighter, cellphone ken ti personal a kwarta ti suspek a 260 a pisos.
Iti agdama, maisagsaganan ti kaso a maipila kontra ken ni Corpuz.