LAOAG CITY – Inbatad ni Mr. Medel Daoang, mangidadaulo iti slaughter house iti ili ti San Nicolas a nangiyuswat da ti surprised inspection iti San Nicolas Public Market kangrunaan dagiti paglakoan ti karne.
Daytoy ket kalpasan a maipagarop nga adda ti nakagatang ti double dead a karne ti baka iti nasao a tiendaan.
Inlawlawag na nga iti inyuswat da nga inspeksyon ket naduktalan da a saan a double dead ti nagatang ti maysa a residente no di ket paco wenno dagiti saan a nalako ngem inpan da iti freezer tapno ilako iti sumaruno nga aldaw.
Inbaga na ti paco ket naitipon kadagiti kaparparti a karne ken possible a ti parte a nagatang ti maseknan ket saan unay a naikkan ti yelo isut gapuna nga adda ti panagberde ti kolor na.
Segun ken ni Daoang, ti pagilasinan no double dead ti magatang a karne ket nalitem ti kita na idinto a no paco ket agberde ti kolor na.
Gapu iti daytoy, inbatad ni Daoang a sakbay a maiserrek dagiti paco ket inspeksyunen da a naimbag.
Innayon na a kayat da a dumalan ti training dagiti aglaklako ti karne iti tiendaan iti nasao nga ili no kasanu ti pannakai-freezer a naimbag dagiti tagilako da tapno awanen ti agbalin a problema.
