LAOAG CITY – Inlawlawag ni Mr. Rommel Nanay, bise presidente iti Meat Vendor Association ditoy ciudad ti Laoag no anya ti napagsasaritaan da iti pannakitaripnong da kenni Mayor Michael Marcos Keon.
Segun kenni Nanay, kiniddaw da iti pannakalapped ti panagibyahe ti baboy a rumwar ditoy probinsya gapo ta adda dagiti aggatang iti backyard.
Kunana a no saan a malapdan daytoy ket maibus ti suplay ti baboy.
Inbatad na met nga inpanamnama ti mayor nga ipakammo na daytoy iti Provincial Veterinary Office ken nasken a maimbentaryo dagiti adda ti piggery na ditoy probinsya, kasta pay a dagiti laeng adda ti permit na ti mabalin nga agibyahe ti baboy.
Inadmitir na a gapo iti mapaspasamak ket malugi da ken bassit laengen dagiti maparparti a baboy iti inaldaw, kasta pay ti presyo a naaprubaran ket 240 a pisos idinto a ti live weight ket 150 a pisos iti kada kilo.
Naamoan a dagiti taga sabali a probinsya ket umabot iti 190 agingga iti 200 a pisos ti paggatang nga isu ti pagparikutan da iti agdama.
Mainaig iti daytoy, kunana a dagiti dadduma pay nga arungaing da ket saan a nasungbatan gapo ta saan met a nagatendar iti taripnong ti Provincial Veterinarian.
Nupay kasta, mangnamnama ni Nanay a maaksyunan met laeng dagiti concern da maipanggep iti adda a problema iti suplay ti baboy ditoy probinsya.
