LAOAG CITY – Inrakurak ni Governor Matthew Marcos Manotoc a mangrugi ti pannakaipatungpal ti localized Modified Enhanced Community Quarantine intono Nobyembre 27 ita a tawen basar iti agdama a DOH guidelines ken medical data.
Basar iti statement, epektibo ti MECQ agingga a bumaba ti nangato a kaso ti COVID-19 ditoy siudad.
Kiniddaw na iti publiko iti saan a panagiwaras ti saan a naberipikar wenno premature nga impormasyon ken iti I-share laeng dagiti opisyal a rakurak ken impormasyon.
Inpasigurado ni Manotoc nga agtultuloy dagiti basic service para kadagiti umili ken ikarkarigatan ti gobyerno probinsyal ken ti city government para iti kinatalged ti publiko.
Immunan nga inpakaammo ni ABC President Mikee Fariñas dagiti napagsasaritaan da iti lokal a gobyerno dagiti mabalin nga addang iti pannakaipatungpal ti MECQ.
Karaman daytoy iti temporaryo a saan pay laeng a makastrek ditoy siudad ti Laoag dagiti aggapu iti sabali nga ili wenno siudad, ti dati a naiyuswat a pannakabarikada dagiti barangay ken addaan laeng iti one-entry, one-exit point.
Kuna na a maipawil kadagiti residente iti maysa a barangay a mapan iti sabali a barangay, agraman kadagiti construction workers a saan nga agnanaed iti dayta a barangay.
Malimitaran ti garaw dagiti tattao ken maipawil iti panagruwar dagiti agtawen ti 60 agpangato ken agtawen ti 18 agpababa
Kuna ni Fariñas a mabalin a makastrek dagiti agideliver kadagiti essential goods ngem saan da a mabalin ti agbayag wenno agibaba da laeng kadagiti kargamento kalpasan na ket pumanaw dan.
Inbatad na a maaddaan ti massive swab testing ditoy siudad.
Innayon ni Fariñas nga agtultuloy nga agawat ti siudad kadagiti returning resident ken maidiretso da iti quarantine facility idinto a naipawil paylaeng ti panaghome quarantine.
Nakumpirmaran met ti Bombo Radyo Laoag iti panagserra ti merkado publiko ita nga aldaw.
Kabayatanna, inpakaammo ni Police Lt. Col. Rafael Lero, a nakasaganan dagiti kameng ti PNP Laoag a mangipatungpal kadagiti pagalagadan iti Modified Enhanced Community Quarantine.
Kuna na a tumulong ken imonitor ti PNP dagiti nagduduma a checkpoint iti kada barangay.
Segun kenni Lero, agdepende iti guidelines iti addang da para kadagiti taga siudad ti Laoag ken dagiti mapalubusan a sumrek ditoy siudad a naggapu iti sabali nga ili.
Inbatad na a possible nga adda latta dagiti exemption iti panagserrek ken panagruwar kangrunaan kadagiti indibidual nga agtrabtrabaho kadagiti maipalubos nga establisimiyento nga agoperar kabayatan ti MECQ.
Innayon ni Lero a masapul pay iti pannakaipresentar kadagiti permit ken dadduma a dukomento kangrunaan kadagiti gumatang ti agas kadagiti parmasya ditoy siudad.
