LAOAG CITY -Maipan iti babaen ti localized modified enhance community quarantine iti siudad ti Batac, iti ili ti Bangui, Dingras, Dumalneg, Marcos, Pagudpud, Paoay, Pasuquin, ken Solsona nga agepekto intono Hulyo 23, 2021.
Iti EO no. 139-21 ni Gov. Matthew Marcos Manotoc, masapul a liklikan dagiti 3C’s wenno Closed areas, Crowded places, ken Close contact.
Rumbeng iti panagisout ti face mask ken panangobserbar ti social distancing.
Nalimitaran ti garaw dagiti tattao kadagiti nasao a lugar para laeng ti panagtrabaho, panaggatang kadagiti kasapulan, serbisyo ken panagehersisyo.
Maiparit a rumwar dagiti agtawen ti 18 agpababa ken agtawen ti 65 agpangato agraman dagiti addaan ti immunodeficiency, comorbid, masikog ken masapul na agtalinaed da laeng iti uneg ti pagtaengan.
Maipatungpal ti liqour ban ken curfew manipud alas-nuebe ti rabii agingga iti alas-kuatro ti parbangon.
Saan a sakop ti curfew dagiti agtrabaho iti rabii kas kadagiti health workers, hospital personnel, iti pribado wenno pampubliko a pasilidad, empleyado ti gobyerno, kameng ti PNP ken BFP, ken dagiti maibilang nga APOR.
Iti pribado ken pampubliko a transportasyon, ket maysa a pasahero ti maipalubus nga aglugan iti tricycle, 50% capacity iti Jeep, ken dua ti pasahero iti taxi.
Iti boundary control, naiget a mamonitor dagiti sumrek ken ruwar kadagiti nasao nga ili ken iti siudad ti Batac babaen ti PNP ken dadduma nga law enforcement agencies.
Maddaan met ti checkpoint iti kada LGU tapno masigurado a saan a makastrek dagiti possible nga agiwaras ti virus.
Naikkan met ti bileg dagiti local chief executive a mangipatungpal ti checkpoint kadagiti barangay ken pannakaiyisyu ti barangay pass slips.
Kabayatanna, para kadagiti lumabas laeng iti maseknan nga ili wenno siudad ken agdepende iti protocol kadagiti maseknan a government personnel.
Naipawil ti mass gathering kangrunaan iti movie screening, concerts, sporting event, entertainment activities, community assemblies ken non essential work activities.
Maipalubos ti panagtitipon para iti critical government services, critical humanitarian, ken religous gatherings babaen iti pammalubus ti gobyerno probinsyal ken maseknan nga LGU idinto a masurot ti minimum health standards.
Nalimitaran ti indoor religous gathering iti 25 a tattao ken saan a nasursurok ngem 30 a porsiento iti venue capacity ken mairekrekomendar iti pannakausar ti online.
Kadagiti nagminatay, siyam laeng nga aldaw ti naipalubus para iti mansayag ken limitado iti 15 a tattao dagiti makipagladingit idinto a maipawil ti musiko kabayatan ti pannakaimansayag ti pimmusay.
Maipalubos laeng ti musiko iti pannakaitabonen ti minatay ken saan a lumabes iti 10 a tattao.
Maipalubos pay ti panagehersisyo, kas iti outdoor walking, jogging, running, wenni biking ngem masapul a masurot ti minimum health standards.
Mamulta wenno ag-render iti community service dagiti agsalungasing kadagiti pagalagadan.
