LAOAG CITY – Naragsak nga inpakaammo ni Mr. Cesar Bucsit, pannakangiwat ti Region I Athletics Association a ngimmato ti Medal Standing ti Ilocos Region para iti Palarong Pambansa 2025.
Inbatadna a basar iti kaudian a datos nga adda kenkuana, adda ti 5 a gold medals, 14 a silver medals ken 10 a bronze medals ti nagun-od ti Ilocos Region idi tawen 2024 idinto a 13 a gold medals, 16 a silver medals ken 26 a bronze medals ita a tawen.
Kunana a gapu iti daytoy ket ngimmato ti ranking ti Ilocos Region a manipud iti Rank 15 idi tawen 2024 ket addan iti Rank 12 ita a tawen.
Inlawlawagna nga awan met ti nagbalin a seryoso a problema kadagiti amin a pambato nga atleta ti rehion uno kabayatan ti panagay-ayam dagitoy manipud kadagiti nagduduma a tay-ak ti ay-ayam.
Innayonna nga agbalin a naiget ti seguridad ti panagawid dagiti amin a maseknan nga atleta, coaches, technical officials ken dadduma pay.
Kabayatanna, nagyaman ti pannakangiwat ti Region I Athletics Association kadagiti amin a timmulong ken adda iti likudan iti panagballigi ti pannakaisayangkat ti naindaklan nga aktibidad.
