LAOAG CITY – Inrakurak ti Philippine Charity Sweepstakes Office (PCSO) a rinugianen nga i-fully digitalize ti panangipaayda ti Medical Assistance Program (MAP) para kadagiti umili nga agkasapulan ti tulong medikal.
Daytoy ket babaen iti rollout ti electronic guarantee letters (e-GLs) tapno maaprobaran dagiti benepisiario idiay Metro Manila.
Agbalinen nga available ti Medical Assistance Program assistance kadagiti aplikante, pakairamanan ti weekends wenno kalpasan ti office hours iti tulong ti e-GL issuance.
Inbatad ni Philippine Charity Sweepstakes Office General Manager ken Vice Chairman of the board of directors, Melquiades “Mel” Robles a ti kangrunaan a gagemda ket maipaay ti Medical Assistance Program assistance kadagiti pasiente pakairamanan iti aldaw ti Sabado ken Domingo.
Inlawlawag ni Robles, inbilinen ni Presidente Ferdinand Marcos Jr. dagiti ahensia ti gobierno a no mabalbalin ket i-digitalize dagiti sistema ken operasion dagitoy tapno ad-adda a mapasayaat ti panangipadanonda ti serbisio ken tulong ti gobierno para kadagiti umili.
