LAOAG CITY – Pabor ni Dr. Alan Taylan, ti St. Camillus de Lellis Hospital ditoy siudad ti Laoag ti mailunglungalong a linteg iti Senado a mapatawan ti pannusa dagiti ospital ditoy Pilipinas a mangisaysayangkat ti palit-ulo scheme wenno ti panang-hostage kadagiti kabagian no adda ti pimmusay nga indibidual a saan a makabayad iti hospital bill.
Nupay kasta, inpalgakna a masapol nga adda ti napintas a komunikasion iti nagbaetan ti ospital ken ti pamilia ti pasiente kas ti promissory note wenno katulagan a mangibagbaga ti panagikarida nga agbayad iti hospital bill apaman nga addanton ti pagbayadda.
Segun kenkuana, maawatanna dagiti pasiente maipanggep ti estado iti panagbiagda no saanda a makabayad dagus iti hospital bill gapu ta maawatanda met ti sangsangoen a situasion dagiti maseknan a pamilia ti pasiente.
Inbatadna a masapol met latta a singirenda dagiti bayad dagiti pasiente agsipod ta kasapulanda met ti panangpasueldo dagiti hospital staff ken personnel iti ospital.
Mainaig iti daytoy, dimmawat ti naan-anay a pannakaawat ni Dr. Taylan kadagiti maseknan a pamilia ti pasiente a napateg met ti pannakasingir kadagiti hospital bill dagitoy.
Maipalagip nga inlungalong ni Agri Partylist Rep. Wilbert Lee ti House Resolution ti 1674 tapno maimbestigaren ti illegal practice a maipagarup nga isaysayangkat ti maysa nga ospital a panang-hostage kadagiti kabagian ti pasiente a pimmusay a saan a makabayad iti hospital bill.
