LAOAG CITY -Manamnama a malpas ti medical quarantine ni dati a Senador Ramon ‘Bong’ Revilla Jr. ken dagiti pada na nga akusado iti maanomalya a flood control projects iti Bulacan intono martes, Enero 27 wenno intono miyerkules, Enero 28.
Daytoy ti inbatad ni Bureau of Jail Management and Penology (BJMP) spokesperson Jail Superintendent Jayrex Bustinera.
Segun ken ni Bustinera, ti pito nga aldaw a quarantine period ket pakairamanan ti security ken risk assessments.
Kuna na nga agpapan ita ket awan pay ti makitkita a sakit ti dati a senador.
Innayon ni Bustinera a malaksid iti panagnayun da ti security measures, agtalinaed a normal ti operasyon iti Quezon City (QC) Jail Male Dormitory a pagtalinaedan da Revilla ken dagiti pada na nga akusado.
Immunan nga inbilin ti Sandiganbayan Third Division ti temporary a pannakaibalud ni Revilla ken dagiti pada na nga akusado iti jail facility kalpasan a nagpila ti Ombudsman ti malversation case kontra kadakuada gapu iti maipagarop a P92.8-million ghost flood control project iti Pandi, Bulacan.
Kadwa ni Revilla da dati a Department of Public Works and Highways Bulacan engineers Brice Hernandez, Jaypee Mendoza, Arjay Domasig ken finance section chief Juanito Mendoza.
