LAOAG CITY – Inlawlawag ni Dr. Jessa Mae De Guzman, Medical Specialist II ti Public Health Unit iti Mariano Marcos Memorial Hospital and Medical Center iti siudad ti Batac a saan laeng dagiti health care workers ti adda ti responsibilidadna tapno mapagtalinaed iti kinatalged dagiti pasiente iti maysa a balay-pagagasan.
Segun kenkuana, iti tunggal maysa ket adda ti napateg a responsibilidadna kas ti panagpakonsultar iti doktor a rumbeng nga ibaga ti pudno a marikrikna, dagiti agas a tumtumaren, sakit a sagsagabaen ken dadduma pay.
Inbatadna a dagiti health workers ket ad-adalenda ti maaw-awagan nga Standard Operating Procedure wenno SOP ken iti agtultuloy a panagsanayda tapno maipaay ti napintas a serbisio medikal kadagiti pasiente wenno kinatalged dagitoy.
Kunana a babaen iti pannakaitandudo ti salun-at ket agtultuloy a manayonan dagiti impormasion a rumbeng a maammoan dagiti pasiente ken health care workers no sadinno ket mangisaysayangkatda ti forum iti tunggal Lunes ken mangiyuswatda pay ti panagsanay kadagiti Barangay Health Workers.
Innayonna nga iti kada tawen ket ikarkarigatanda a mapasayaat ti serbisioda para kadagiti pasiente.
