LAOAG CITY – Medical waste wenno dagiti ramit a nagawangan ken nausar iti ospital ket karaman kadagiti naruay a basura a naibelleng iti igid ti kalsada iti Brgy. Vira ditoy siudad ti Laoag.
Basar iti nagbalin a duktal ti News Team ti Bombo Radyo Laoag ket ditoy mismo a naimatangan dagiti adu a basura nga agkaiwarang iti igid ti kalsada no sadino makita dagiti lumabas wenno dagiti manarimaan nga agjog-jogging iti lugar.
Gapu iti daytoy, segun ken ni Ms. Emelyn Julian, maysa kadagiti masansan nga agjog-jogging iti nasao a lugar a maamak daytoy amangan laeng ket mapaddakanda dagiti medical waste kas kadagiti babassit a botelya, syringe, COVID-19 test device, injection ken dadduma pay.
Inbatadna a saan a napintas ti nasao a pasamak gapu ta daytoy ket maibilang a peggad iti salun-at dagiti tattao nangruna kadagiti masansan a magmagna wenno dumaldalyasat iti nasao a kalsada.
Inlawlawagna a no bilang daytoy ket aggapu iti ospital ket dakkel a panagsalungasing iti Republic Act No. 9003 wenno ti Ecological Solid Waste Management Program.
Kunana a masapol a mapaigetan ken mapagsungbatan dagiti adda iti likudan iti daytoy gapu ta saan a mabalin a mabaybay-an dagiti nasao nga aramid a mangitunda ti pannakarisgo iti salun-at dagiti umili.
Innayonna a rumbeng a kitaen ti asinoman nga akin-responsibilidad iti daytoy tapno maliklikan ti posible a pannakaiwaras ti sakit manipod kadagiti nausar a medical equipment.
