LAOAG CITY – Naikkat dagiti tallo a ngipen ken nagsagaba ti gasgas iti nagduduma a paset ti bagi ti maysa a mekaniko idinto a nagsagaba met ti sugat ti maysa a food vendor iti karambola dagiti tallo lugan iti national highway bisinidad iti Barangay 51-A, Nangalisan ditoy ciudad ti Laoag.
Nabigbig dagitoy a da Kenny Castillo y Ubando, agtawen ti 34, awanan ti asawa ken residente iti Barangay Darayday ditoy ciudad ti Laoag ken ni Cyruz Joshua Julian, agtawen ti 18, baro, food vendor ken residente met laeng iti Barangay Cabungaan ditoy ciudad ti Laoag.
Iti imbestigasyon, kabayatan nga agpapa-abagatan a direksyon ni Castillo a nakalugan iti honda wave ket nadungpar na ti tricycle nga inturong ni Julian.
Gapu iti kapigsa ti panagdinnungpar dagiti dua ket arigna nagpuligos dagitoy ken naipan ti wave iti daya ti tricycle.
Ditoy metten a sumungad ti Toyota Vios nga inturong ni Mr. Randy Damo, agtawen ti 37, ken taga Barangay Balatong a nakadungparan na manen ti Wave.
Agpada a naitaray iti Governor Roque Ablan Senior Memorial Hospital da Castillo ken Julian para iti pannakaagas da idinto a saan a naan-ano ti driver ti kotse.
Nakumpirmaran a nakainom ti arak ni Castillo idi mapasamak ti insidente.
