LAOAG CITY – Natay ti maysa a mekaniko kalpasan a napaltogan babaen iti suspek iti Brgy. 11 iti ili ti San Nicolas.
Segun kenni Police Staff Sergeant Jhan Lay Apostol, imbestigador iti PNP San Nicolas, possible a namin lima a daras a napaltogan ti biktima basar kadagiti narekobre a lima a kapsula ti 5.56mm a bala ti armalite nga inusar ti suspek.
Binigbig ni Apostol ti suspek a ni Jefferson Badua a taga Brgy. 10 iti nasao nga ili ken ti biktima ket ni Edwin Martin Jr ken taga Brgy. 13 ditoy siudad ti Laoag.
Inbatad na a kabayatan ti panagpatarimaan ti biktima iti motorsiklo na iti nasao a barangay ket dita a nalabsan met ti suspek ken sinardengan na daytoy.
Kuna ni Apostol, basar kadagti nakakita ket binakal ti suspek iti bato ti biktima ngem nakataray daytoy kalpasan na ket sinublian ti suspek ti biktima ket ditan a pinaltogan na usar iti M16 armalite.
Possible a dati a susik seknan iti motorsiklo ti motibo ti pammaltog.
Naitaray ti biktima iti Black Nazarene Hospital ngem naideklara a dead on arrival.
Innayon na a kalpasan ti pammaltog ket dagus a naglibas ti suspek a naglugan iti maysa a Toyota Vios a nagmaris iti silver.
Naamuan ti Bombo Radyo Laoag nga adu dagiti nakakita iti suspek a pinaltogan na ti biktima.
Kabayatanna, inlawlawag ti saanen a nabigbig a mekaniko ti motorsiklo a nagpatarimaanan ni Edwin Martin Jr alyas Pangloy, dagiti nakita na iti napasamak a pammaltog iti pagtaengan da iti Brgy. 11 iti ili ti San Nicolas.
Kuna na a nagsardeng ti suspek a ni Jefferson Badua, alyas Buding idi nakita na ti biktima ket dita a binakal na ti bato.
Inbatad ti mekaniko a nagpangta ti suspek a sublianan na ti biktima ket saan da a namnamaen nga addan ti iggem na nga armalite.
Idi pinaltogan na ti biktima ket dagus da a nagtataray nga immuneg iti pagtaengan.
Kuna na a dagus met a nakapagresponde ni Kagawad Mario ken dagus a naitaray iti ospital babaen iti tricycle.
Inpetteng ti mekaniko nga innem da a nakakita iti insidente.
Mainaig iti daytoy, inbunannag ti mekaniko a panggep iti panaggatang ti Chop-chop ti possible a namunganayan ti pammaltog ngem ti ammo da ket awan laeng kadakuada ti pasamak iti kallabes.
Innayon na nga adda pay ti gundaway a nagkinkinnarit dagiti dua iti kallabes.
Inpasigurado ti saanen a nabigbig a mekaniko a ni Buding nangpaltog kenni Pangloy a poon ti nakatayan na.
