LAOAG CITY – Kalikagom ni Mr. Joven Pasion iti Barangay Manalpac iti ili ti Solsona a maaksyunan ti maipagarop a pannakadangran ti agtawen ti 11 a babai a kaanakan na babaen kadagiti agina.
Segun kenni Pasion, ti namungayan daytoy ket ti riri dagiti tallo nga ubbing nga agga-ayam pakairamanan ti kaanakan na seknan iti balikas a “kikiam”.
Inlawlawag na a gapo iti saan a panagkikinnaawatan dagitoy ken maipagarop a dinanog ti maysa kadagiti ubbing ti biktima a nagresulta ti panagkabil dagitoy agingga a nakiraman ti lola ti maseknan ken pinungot na ti kaanakan na.
Kalpasan daytoy, kunana nga inbaga ti lola iti anak na nga isu ti ama ti maysa kadagiti ubbing ti napasamak.
Gapo iti daytoy, kunana a ti nabartek nga ama ket maipagarop a tinungpa na iti namin-dua a daras ti biktima partikular iti akin-kannigid a pingping daytoy.
Inpetteng na a nakita na a mismo ti panangtungpa ti ama iti kaanakan na gapo ta inayaban isuna dagiti lima a babbai nga isu ti tumaktakder ita a testigo iti napasamak.
Kunana a dagus nga immasideg iti ayan ti kaanakan na ken sinaludsod na no anya ti napasamak ngem ditoy a maipagarop nga intudo-tudo manen ti lalaki ti ubing.
Inbatad na a nagsagaba ti dugol iti ngatoen iti akin-kannawan a kiday, limmabaga ti pingping ken nasakit ti anit ken puon ti lapayag ti biktima, ken nagtegtegerger iti buteng na.
Mainaig iti daytoy, napan ni Pasion iti PNP-Solsona ken naibalakad nga ipamedical ti ubing ket ireport na iti barangay.
Nupay kasta, patien ni Pasion a saan a patas ti pannakatratar ti napasamak gapo ta maipagarop nga kwinestyunaran ti kapitan no apay nga isuna ti agreklamo iti laksid nga adda met ti ama ti ubing a biktima.
Naamoan a dagiti nagannak iti ubing a biktima ket nabayagen a nagsina.
Kabayatanna, ikarkarigatan met ti Bombo Radyo Laoag nga alaan ti komento wenno reaksyon ti pamilya ti mairekreklamo.
