LAOAG CITY – Nadungpar ti maysa a Toyota Baby Altis ti ubing a lalaki nga agtawen ti 10 iti paset ti Barangay 12 ditoy ciudad ti Laoag.
Nabigbig ti nangiturong ti Toyota Baby Altis a ni Mr. Clyde Cardona, agtawen ti 24, ken residente iti Barangay 23 iti ili ti Bacarra.
Iti eksklusibo nga interview ti Bombo Radyo Laoag ken ni Cardona, inbatad na a kabayatan ti panagpad-padaya na a direksyon iti nasao a lugar ket kellaat a rimuar a nagtaray ti ubing manipod iti saanna nga ammo a kalsada rason a nadungpar na.
Inbatad na a ginandat na a liniklikan daytoy ngem nadungpar na latta ti biktima.
Kuna na a ti nakita na a sugat ti ubing ket iti lapayag na.
Naitaray ti biktima iti Governor Roquer Ablan Senior Memorial Hospital (GRASMH) para iti naan-anay a pannakaagas na.
Inpasingked ni Cardona a nakasagana a tumulong para iti pannakaagas ti ubing.
