LAOAG CITY – Natiliw ti maysa a wanted person a menor de edad iti Brgy. 21, San Marcos iti ili ti Sarrat.
Ti akusado ket agtawen ti 16, Grade 10 Student ken residente met laeng iti nadakamat a barangay.
Segun iti report, kadwa dagiti kameng ti Philippine National Police (PNP) ni Miss Offelia Respicio, Municipal Social Welfare and Development Officer (MSWDO) iti nasao nga ili a napan nangiserbi ti warrant of arrest nga inparuk-at ni Hon. Judge Bonhoefer Vergara Bernardez iti RTC Branch 11 ditoy ciudad ti Laoag kontra iti nasao nga akusado gapu iti kaso na nga Acts of Lasciviousness.
Nairekomendar ti 36 ribo a pisos a piyansa ti akusado para iti temporaryo a pannakawaya-waya na.
Naamoan a namonganay ti kaso ti nasao nga akusado gapu iti panagramas na ti barukong ken patong dagiti sumagmamano a babbai kabayatan a daytoy ket nakamotorsiklo.
