LAOAG CITY – Inpakaammo ni Dr. Charito Malicad, ti information officer iti lokal a gobierno ditoy siudad ti Laoag a naisublin iti salinong ti Bahay Pag-Asa ti menor de edad a naglibas manipod iti pasilidad iti kallabes.
Segun ken ni Malicad, nabirokan ti menor de edad iti Brgy. Albano iti ili ti Dingras.
Inlawlawag na a ti pannakaduktal ti lugar a nagturungan daytoy ket babaen iti nagbalin nga stratehiya ti Civil Security unit (CSU) ken PNP ditoy siudad ti Laoag nu sadino a nausar ti social media ken sms iti cellphone.
Kuna na a gapu iti daytoy, ket naamoan ti lugar ti menor de edad kalpasan ti tallo nga aldaw sipud naglibas manipod iti Bahay Pag-Asa idi Marso 2.
Kabayatanna, patien ni Malicad a ti ado a daras a panaglibas ti menor de edad ket gapu iti kalikagum na a makaaliwaksay manipod iti pasilidad.
Innayun na nga adda ti naiget a seguridad iti Bahay Pag-Asa ken mangnamnama a saanen a maulit ti panaglinas ti menor de edad.
Immunan nga inpakaammo ni Malicad a basar iti palawag ni Retired Brigidier Gen. Nestor Pedro, ti mangidadaulo ti CSU, namin ado a daras a napan nagisalapay ti twalya ti menor de edad ken iti maikatlo a daras a panagisalapay daytoy ket dita a nakaala ti gundaway tapno aglibas babaen iti pananguli na iti alad.
