LAOAG CITY – Naipanen iti Bahay Pag-asa ti menor de edad a maipagarop a nangitaray iti maysa a motorsiklo a kukua ti maysa a residente iti Barangay Nangalisan-A ditoy ciudad ti Laoag.
Nabigbig ti agtagikua iti motorsiklo a ni Juhmer Tinaza Sacaben, agtawen ti 30, naasawaan ken residente iti nasao a lugar
Daytoy ket kalpasan a natiliw ti menor de edad a suspek iti mismo a boarding house na iti Barangay 12 ditoy ciudad apaman a nagreport ni Sacaben.
Basar iti report manipud iti Philippine National Police ditoy ciudad ti Laoag, napan ni Sacaben iti pagtaengan ti kabsat na iti Barangay 23 ditoy ciudad idi Hulyo 24 ken inparking na iti sangwanan ti balay ti maseknan ngem idi sinublianan na ket awanan daytoy.
Gapo iti daytoy ket sinaludsod na iti kabsat na no isu ti nangusar iti motorsiklo ngem naamoan na a saan a nakita ti maseknan isut gapo na nagkiddaw ti kopya ti footage ti CCTV a nainstolar iti pasdek nga asideg iti pagtaengan.
Naamoan nga iti dayta nga aldaw ket saan a nakaala ti kopya gapo ta malukatan da laeng iti malem ken gapo iti kaawan ti kuryente iti napalpalabas nga aldaw ket idi kalman laeng a nakaala iti kopya.
Basar iti CCTV footage, alas-dos iti parbangon iti Hulyo 24 ket naglugan iti motorsiklo ti suspek ken nagturong iti abagatan.
Kalpasan iti daytoy ket dagus a nangiyuswat ti imbestigasyon dagiti otoridad ken nakita da a mismo ti motorsiklo iti Barangay 12 ken awan ti naipakita ti menor de edad a dokumento ken inbaga met ti biktima a daytoy ti mapukpukaw a motorsiklo na.
Kabayatanna, dagus met a tiniliw dagiti otoridad ti suspek ken iti agdama ket adda iti kustudiyar ti Bahay Pagasa.
