LAOAG CITY – Nakalibas ti lalaki nga agtawen ti 15 a taga ili ti Piddig manipud iti Bahay Pag-asa iti Brgy. 48A Cabungaan ditoy siudad ti Laoag.
Iti pannakisatira ti Bombo Radyo Laoag kenni Ret Major Ernesto Sadian, kuna na nga agarup alas-sais ti rabii idi kalman ket saan da a makita ti menor de edad ken saan da nga ammo ti eksakto nga oras a panaglibas na.
Maipagarup nga adda pay ti maidandanun a report iti Bahay Pag-asa a maipagarup nga adda dagiti sumagmamano a residente a natakawan ken at-atapen da a ti menor de edad ti akin aramid.
Maysa a residente iti Brgy. Nalbo ken maysa met iti Brgy. 48A Cabungaan dagiti maipagarup a natakawan.
Nupay kasta, awan pay ti makapaneknek a ti ubing ti nagtakaw ngem mapagat-atapan daytoy.
Naipakaammo dagiti otoridad iti pamilya ti menor de edad iti ili ti Piddig ti panaglibas ti ubing idinto nga agtultuloy ti panagbirok dagiti otoridad iti daytoy.
Maipalagip a ti menor de edad ket suspek iti panagtatakaw a napasamak iti Brgy. San Mateo ditoy siudad ken natiliw iti paset iti ili ti Sinait, Ilocos Sur itay kallabes.
Daytoy ket gapu ti panangitaray na ti motorsiklo a Mio Aerox Blue manipud iti pagtaengan ti biktima a ni Ram Donato a residente iti nasao a barangay.
Binulod laeng ni Donato ti motorsiklo iti pagayam na a residente iti ili ti San Nicolas.
