LAOAG CITY – Inadmitir ti natiliw a menor de edad, tubo iti ili ti Piddig, a tinakaw na ti motorsiklo a Mio Aerox Blue a nakaparking iti pagtaengan ni Ram Donato y Tagalicud, agtawen ti 19 ken residente iti Brgy. 52-A San Mateo ditoy siudad ti Laoag.
Kuna ti menor de edad a simrek iti pagtaengan ni Donato ken innala na ti tulbek ti nasao a motorsiklo.
Segun ti menor de edad, naitaray na ti motorsiklo agraman ti maysa a cellphone ken nasurok sangaribo a pisos nga adda iti compartment ti motorsiklo.
Saan a naibaga ti menor de edad no anya ti kalikagum na nga ubraen iti ili ti Sinait.
Maipalagip nga inpabulod ni Ralph Jayson Calaro y Corpuz, agtawen ti 22 ken residente iti Brgy. 2 iti ili ti San Nicolas ti motorsiklo na kenni Donato idi ta nadiskubre ti maseknan a bimmulod a mapukpukaw daytoy.
Dagus a naireport iti PNP ti insidente ken naarestar da ti menor de edad iti border checkpoint iti Brgy. Tapao iti ili ti Sinait, Ilocos Sur.
Iti panagsarita ni Ram Donato iti Bombo Radyo, innala mismo ti suspek ti tulbek ti motorsiklo iti pagsarmingan ti pagtaengan da rason a naitaray ti suspek daytoy.
Awan met ti sabali nga innala ti suspek iti uneg ti pagtaengan malaksid laeng ti tulbek ti motorsiklo.
