LAOAG CITY – Eksklusibo nga inyistorya iti Bombo Radyo Laoag ti maysa a menor de edad a biktima ti pannakadangran babaen kadgaiti dua a saan pay a nabigbig nga indibidual bayat nga adda iti Aurora Park.
Segun iti biktima, kalpasan a nagbike iti pasado alas-siete ket naginana iti nasao a parke.
Nupay kasta, bayat a nakatugaw ket adda lattan nangdanog iti ulo na manipud iti likudan na a rason ti pannakadennag na iti agdan a nagtugawan na.
Dinakamat na a nagsinnublat dagiti dua a suspek a nangdanog kenkuana rason ti pannakaulaw na ken saan a dagus a nakatakder.
Patien pay ti biktima a ti nangala iti video ket kadua dagiti dua a suspek gapo ta naala a mismo ti pannakadangran na.
Kalpasan daytoy, dagus a naglibas dagiti suspek ken ti biktima ket napan met nagreport iti outpost sakbay da a napan nagpa-medical ken naipa-blotter metten daytoy iti pulisya.
Mainaig iti daytoy, kuna ti biktima nga awan met ti nakariri na sakbay a napasamak daytoy ken damo na laeng a nakita dagiti biktima.
Desidido met ti biktima a mangipila ti reklamo tapno saanen a maulit ti kastoy a pasamak.
