LAOAG CITY – Kinumpirmaran ni PLt. Col. Adrian Gayuchan, chief of police ti PNP-Batac iti namindua a panangkarawa ti maysa a lalaki ti kaanakan na a menor de edad a balasitang.
Segun kenni Gayuchan, ti suspek ket agtawen ti 47, awanan ti asawa, drug surenderee ken residente iti Barangay Payao iti nasao a ciudad.
Iti imbestigasyon, kuna ni Gayuchan nga ummuna a napasamak ti maipagarop a panangkarawa ti suspek iti menor de edad idi Marso 8, 2022 iti Barangay Aglipay, ken ti maikadua ket iti Marso 25 a napasamak iti mismo a pagtaengan ti biktima.
Dinakamat ni Gayuchan a kinarawa a mismo ti suspek ti pribado a paset a bagi ti biktima ken insagid pay ti lalaki ti pribado a paset ti bagi na iti saka ti ubing.
Inlawlawag na a saan a dagus nga inpulong ti menor de edad ti napasamak ngem gapo ta saan nan a kabaelan ket inbaga na iti ina na idi Hunyo 15 ita a tawen rason a dagus da a nangipila ti reklamo iti korte.
Kunana a saan met a binutbuteng ti suspek ti biktima ngem mabalin a gapo iti bain ket saan nga inbagbaga ti ubing ti inaramid kenkuana ti uliteg na agingga a saan nan a kabaelan.
Mainaig iti daytoy, naamoan nga awan ti kadua ti menor de edad iti pagtaengan idi napasamak daytoy.
Inpalgak na a basar iti biktima, mapmapan ti suspek iti pagtaengan da tapno makiistorya ken nagtalek met latta dagiti nagannak iti menor de edad nangruna ket kabagyan da ken saan da nga inpagarop a maaaramid ti maseknan daytoy.
Dimmalan met iti medical examination ti biktima ken idi Disyembre 15 ket rimuar ti warrat of arrest ti suspek rason nga inserbi da.
Kabayatanna, naglikudan met ti suspek nga inaramid na daytoy ngem naipila ti kaso a panaglabsing iti Laciviousness Conduct iti babaen ti Sec. 5 (b), Art. III, iti RA 7610 nga addaan ti 200 a ribo a pyansa idinto a ti Act of Laciviousness ket narekomendaran ti 108 a ribo a pisos.
Iti agdama, ti suspek ket nagtalinaed iti kustudiyar ti PNP-Batac ken manamnama a maipaima iti naggapoan ti warrant.
