LAOAG CITY – Maysa nga agina manipod iti Brgy. Salugan iti ili ti Currimao ti nagkamang iti PNP kalpasan ti maipagarup a panangmolestya ti maysa a pastor iti biktima a menor de edad.
Inpakaammo ni Pol. Maj. Maria Aurora Cruz a basar iti palawag dagiti agina, napan iti maysa a panganan ti menor de edad ti sidaen ken dita a nagdanon da iti suspek.
Kuna a bayat nga agpilipili ti gatangen na ti biktima ket kellaat a kinnalabay ti pastor ken dita a maipagarup a binisong na ti pingping daytoy.
Mainaig iti daytoy, maipagarup a kinarawa pay ti pastor ti pribado a parte ti bagi ti menor de edad.
Kabayatanna, inpakaammo ni PMaj. Cruz a maiyur-uray ti ama ti biktima nga ada iti ballasiw taaw tapno pormal a mapilaan ti kaso ti suspek.
Inbatad Cruz nga ita nga aldaw ket danunen ti kapulisan tapno maamoan ti takder na iti nasao nga alegasyon.
Naamoan a ti biktima ket agtawen ti 13 idinto a ti suspek ket agtawen iti 61.
