LAOAG CITY – Dead on the spot ti maysa a menor de edad idinto a natay bayat a matamtaming iti ospital dagiti dua a senior citizen.
Daytoy ket kalpasan ti napasamak a desgrasia iti national highway a paset ti Brgy. 5, Davila iti ili ti Pasuquin.
Segun ken ni PMaj. Vencioly Luzano, hepe ti Philippine National Police iti ili ti Pasuquin, namunganay ti desgrasya kalpasan a napukawan iti kontrol ti manibela iti inturong nga SUV ni Dr. Anselme Ang y Wy, agtawen ti 30, awanan asawa, Opthalmologist ken tubo idiay San Juan, Metro Manila ngem agdama nga agnanaed iti Brgy. Cal-laguip iti Siudad ti Batac ken kadua na iti lugan Dr. Kimberly Borja y Perez, agtawen ti 27, awanan asawa, Pediatrician ken residente idiay Fairview, Quezon City.
Inbatad na a basar iti naiyuswat nga imbestigasyon, bayat nga agpaamianan ti SUV ket nag-overtake iti sarsarunuen na a lugan ken dita a napukawan ti kontrol iti manibela ti driver.
Inpakaammo ni Luzano a nadungpar ti nakaparada a tricycle iti igid ti kalsada ken kalpasan na ket dagiti magmagna a baket ken menor de edad a nabigbig nga isuda Dese Laureta y Sinang, agtawen ti 65, naasawaan kenni Irish Clemente y Sinang, agtawen ti 14, agpada dagitoy nga agnanaed iti Brgy. Davila.
Mainaig iti daytoy, inpakaammo na a nadungpar pay ti kinasibbat a kurong-kurong ti SUV ken inturong met ni James Buted y Albano, agtawen ti 63, naasawaan ken residente met laeng iti nasao a Barangay.
Inbatad ni hepe Luzano a gapu iti napigsa nga impact ti desgrasia ket dead on the spot ti menor de edad idinto a napugsatan ti anges ti senior citizen a kadua na ken driver ti kurong-kurong bayat a pannakataming dagitoy iti Governor Roque Ablan Sr Memorial Hospital ditoy siudad.
Kunana a nagsagaba ti nakana a sugat iti ulo dagiti biktima idinto a saan a naan-ano ti driver ti SUV.
Mainaig iti daytoy, inpakaammo ni Luzano a basar iti panakisarsaritana iti pamilia dagiti biktima a pimmusay ket desidido dagitoy a mangipila ti reklamo kontra iti suspek.
Kunana a manamnama a sumango ti suspek ti Multiple Homicide ken nagtalinaed iti kustodyar ti PNP iti ili ti Pasuquin.
Kabayatanna, naamoan a negatibo iti nasanger ti suspek idi napasamak ti insidente.
Nagkiddaw met ti PNP Pasuquin iti Department of Public Works and Highways 1st District Engineering Office iti pannakaiyestablisar dagiti signages iti lugar a nakapasamakan ti desgrasia gapu ta maibilang nga accident prone area.
