LAOAG CITY – Natay ti maysa nga agtawen ti 16 a babai kalpasan a nagbekkel iti poon ti mangga iti Brgy. Anggapang Sur iti ili a Currimao.
Narekobre iti bangkay ti Grade 10 student iti Pias National High School kalpasan nga ingalotna iti tengnged na babaen ti tali iti poon ti mangga iti asideg ti balay da.
Immuna iti daytoy, itay alas-11 ti bigat ket napansin ti kabsat ti biktima nga agtawen ti 12 nga adda iti sabsabali a garaw na no sadinno nga inpabulod ti biktima iti cellphone na iti kabsat na tapno agay-ayam agingga a nakaturog daytoy ket dita nga inaramidnan iti agpakamatay.
Naamoan nga awan ti kadwa da iti balay da agsipod ta adda iti trabaho dagiti nagannak da.
Itay ala-una ti aldaw ket dita a nakita ti maysa kadagiti karruba da iti bangkay ti biktima a nakabitin iti kayo no sadinno a 3 metro laeng iti kangato iti nakaibitinanna.
Basar ti imbestigasyon ti PNP Currimao, adda dagiti nakitada a suicidal post ti biktima iti social media ken nakita iti wallpaper iti cellphone ti menor de edad a mangibagbaga a depressed daytoy.
Malaksid iti dayta, adda pay iti nakita a ladawan na iti cellphone na nga agib-ibit daytoy.
Segun ti ina ti biktima a ni Evelyn Gacisan , nakitana ti anak na nga agib-ibit idi rabii ngem saan na a dinamag ti rasonna.
Rumrumuar a lovelife ken depresyon iti rason ti panagpakamatay ti biktima.
Dukduktalen dagiti otoridad iti nobyo ti biktima a nakaalan na ti depresyon.
Iti agdama, agtultuloy iti imbestigasyon dagiti otoridad mainaig iti nasao nga insidente.
