LAOAG CITY – Kinumpirmaran ni Police Major Arnel Tabaog, hepe ti PNP Vintar a pimmusay ti maysa nga agtawen iti 15 kalpasan ti napasamak a desgrasya iti Brgy. Parut iti nasao nga ili.
Kuna na a nasugsugatan met ti barkada ti biktima nga agtawen iti 14.
Segun kenni Tabaog, nakalugan iti motorsiklo dagiti dua a menor de edad bayat nga agturong dagitoy iti piggery ket dita nakalidlid da iti dakkel a bato rason a napukaw ti balanse ti motorsiklo.
Gapu iti daytoy, naitapuak ti motorsiklo agraman dagiti dua a menor de edad iti kali.
Naitaray dagiti biktima iti ospital ngem naideklara a dead on arrival ti agtawen ti 15 gapu ti sinagaba na a nakana a sugat kangrunaan iti ulo.
Innayo ni Tabaog nga adda ti sungsungbatan ti nagannak ti biktima gapu iti panangimaniher na ti motorsiklo.
