LAOAG CITY – Dead on arrival ti agtawen ti 15 a babai kalpasan ti pannakaidungpar ti nagluganan da a motorsiklo gapo iti gandat da nga intarayan dagiti agpatpatrolya a kameng ti pulisya iti ili ti Bacarra.
Segun kenni Police Captain Joseph Calderon, chief of police ti Philippine National Police iti ili ti Bacarra, kabayatan ti panagpatrolya dagiti otoridad ket nakita da dagiti dua a nakamotorsiklo nga awanan ti helmet ken visibility vest.
Inbatad na a binusinaan da dagitoy tapno agsardeng ken makasarita wenno maballaagan ngem imbes nga ipaigid dagiti maseknan ti motorsiklo da ket pinataray da daytoy.
Gapo iti daytoy, kinamat dagiti otoridad dagiti maseknan ngem idi nakadanon dagitoy iti Barangay Corocor ket saan dan a nasiputan agingga a nakita da laengen iti kurbaan a paset ti kalsada a naidungpar dagiti menor de edad iti puon ti acacia.
Mainaig iti daytoy, gapo iti pannakadesgrasya dagitoy ket pimmusay ti biktima nga isu ti driver ken ti kinalubbon na ket nagsagaba ti sugat.
Naamoan a ti biktima ken ti kadua na ket nagpakada nga adda ti mapan da alaen a project da agingga a nakita dagiti otoridad dagitoy.
Inlawlawag na a ti rason no apay a kinamat dagiti otoridad dagiti menor de edad ket gapo ta ginandat da met nga itarayan dagitoy ken amangan no adda ti madi a banag nga iggem dagitoy.
Innayon na a maaawatan na ti marikrikna ti pamilya ti biktima ngem ar-aramiden laeng met dagiti otoridad ti trabaho da ken saan da a kayat a kastoy ti napasamak.
Kabayatanna, inbatad ni Calderon a maiparit nga agiturong dagiti menor de edad iti laksid nga ammo da ti agmaneho.
Pinalagipan na pay ti publiko kangrunaan na dagiti nagannak a saan a palubusan dagiti annak da nga agmaneho iti ania man a klase ti behikulo ken saan nga ipalubos a rumuar iti rabii tapno maliklikan ti madi a pasamak.
