LAOAG CITY – Kinumpirmaran ni Police Captain Chris Anthony Sorsano, hepe ti PNP Solsona, ti pannakatay ti menor de edad kalpasan a nakimat iti Brgy. Darasdas iti ili ti Solsona.
Kuna na a ti biktima ket agtawen ti 17 ken residente iti Brgy. Aguitap iti nasao nga ili.
Segun kenni Sorsano, agarup alas-dos y media ti malem idi kalman a nakimat ti barito bayat nga agraraep da iti Brgy. Darasdas.
Kadua ti biktima ti maysa a menor de edad ken maysa nga agtawen ti 19 a baro idi napasamak ti insidente.
Inbatad na a dagus a naitaray ti biktima iti Rural Health Unit ngem pimmusay daytoy.
Maimansayag ti bangkay ti biktima iti pagtaengan dagiti nagannak kenkuana.
