LAOAG CITY – Natiliw ti maysa a menor de edad iti naiyuswat a drug buy-bust operation nga inwayat ti PNP ken PDEA ditoy ciudad ti Laoag.
Segun ti report, maipagarop a naglako ti napagango a bulong ti marijuana nga agbalor ti 200 a pisos ti agtawen ti 17 a menor de edad a residente ti Barangay 2 ditoy ciudad ti Laoag.
Nupay kasta, iti interview ti bombo radyo ti nasao a menor de edad, naglikudan na ti alegasyon kontra kenkuana.
Inbatad na a bayat a magmagna ti paset ti Barangay 3 ditoy ciudad kadwa na ti binigbig na laeng ti nagan na a Franklin idi kellaat lattan a ginammatan dagiti otoridad.
Kuna na a kabayatan ti pananggammat kenkuana dagiti otoridad ket nagtartaray met ti kadwa na a ni Franklin.
Inpasingked pay ti nasao a menor de edad a saan nga agin-inom ti arak ken agus-usar ti maipawil a droga.
Iti agdama, isagsaganan ti PNP ti reklamo a maipila kontra ti nasao a menor de edad.
