LAOAG CITY – Nagtalinaed iti kustudyar ti PNP Piddig ti menor de edad a lalaki nga agtawen ti 15 kalpasan a nangitaray ti maysa a motorsiklo a kukua ni Clarissa Paraiso y Silen, agtawen ti 35 ken residente iti Brgy. Cabaroan iti ili Piddig.
Inlawlawag ni Police Capt. Kristopher King Ramos, hepe ti PNP Piddig dagiti napasamak sakbay a natiliw da ti menor de edad.
Kuna na a nagbalaw ni Bryan Paraiso, kabsat ti agtagikua ti motorsiklo, idi awanen ti nasao a motorsiklo.
Segun kenni Ramos, nagsalsaludsod dagiti maseknan kadagiti karruba da ngem nagtalinaed nga awan, rason a nagreport da iti Philippine National Police.
Gapu iti daytoy, ket dagus nga inpakaammo ti PNP Piddig kadagiti amin a municipal police station ti napukaw a motorsiklo.
Agingga a nakaawat ti PNP Piddig ti impormasyon manipud iti PNP Narvacan nga adda ti motorsiklo a nakita da ken agpada ti pakabigbigan na.
Kinumpirmaran met ni Ramos ti naawat da nga impormasyon manipud iti Narvacan mainaig ti motorsiklo a nakita da.
Gapu iti daytoy ket kinemmeg dagiti otoridad ti menor de edad a maipagarup a nangala iti daytoy.
Inpakaammo ni Police Capt. Kristopher King Ramos, hepe ti PNP Piddig a ti menor de edad a lalaki nga agtawen ti 15 ket dati nga aramid na ti panagserrek kadagiti pagtaengan.
Kuna na a ti maysa a nabiktima ti menor de edad ket ni Fr. Randy Manicad Jr. Iti Iglesia Filipina Independiente iti nasao nga ili ken iti dadduma pay nga ili ditoy probinsya.
Segun kenni Ramos, adda ti maiwayat a case study babaen ti DSWD ken ti resulta na ket mainayun iti maipila a reklamo kriminal kontra kenkuana.
Nasdaaw ni Ramos ti palawag ti menor de edad no apay a naaramid ti panagtakaw.
Naamuan na nga aggigiyan ti menor de edad kadagiti lolo ken lola na iti nasao a barangay.
