LAOAG CITY – Pimmusay ti maysa a menor de edad a lalaki nga agtawen ti 17 gapu iti pannakadesgrasya na iti paset ti Brgy. 19, Nambaran iti ili ti Bacarra.
Inbatad ni Police Staff Sergeant Erickson Guira, ti Imbestigador ti PNP- Bacarra a ti biktima ket nagiturong iti Suzuki Raider 125 a motorsiklo, estudiante ken residente iti Brgy. Malampa Sitio Paninaan iti ili ti Vintar.
Kuna ni Guria nga iti naiyuswat nga imbestigasyon ket agpapabagatan ti biktima idi ta kellaat a napukawan ti kontrol iti manibela.
Gapu iti daytoy, inbatad na a naidungpar ti biktima iti steering bar agingga a naipurwak daytoy iti sabali a linya ti kalsada ken nangitunda iti sabali pay a pannakaidungparna na iti kayo ti mahogany.
Inlawlawagna a gapu iti napigsa nga impact ket nagsagaba ti nakana a sugat iti ulo kalpasan a nadadael pay ti suot na nga helmet ken isu ti rason iti pannakatay na.
Naamoan a napasamak ti desgrasia kabayatan ti napigsa a buyat ti tudo idi kalman ti rabii.
