LAOAG CITY – Nailungalong ti maysa a resolusion a mangibilbilin iti Manila Health Department nga ipatungpal ti Manila Menu Nutrition Labeling Ordinance of 2015 tapno maipaayan ti nalawag nga impormasion iti nutrision dagiti taraon kadagiti establishimento iti siudad.
Basar iti naipasa a resolusion ni Manila 1st District Councilor Joaquin Domagoso a “a resolution directing the Manila Health Department to implement ordinance no. 8446, otherwise known as the Manila Menu Nutrition Labeling Ordinance of 2015” ket magutgutigot ti Manila Health Department nga iparuk-aten ti Implementing Rules and Regulations (IRR) tapno naan-anayen a maipatungpal ti nasao a linteg para iti pagsayaatan dagiti residente ti siudad.
Nadakamat a 11 a tawenen ti napalabas sipud naipasa ti ordinansa iti Konseho ti Manila ngem agingga iti daytoy a gundaway ket saan latta pay a naan-anay a naipatungpal.
Basar iti panagadal ti Food and Nutrition Research Institute ti Department of Science and Technology, 4 iti tunggal 10 nga adult a Pilipino ken 1 iti tunggal 10 nga ubing nga adda iti school age ti overweight wenno obese.
