Saan a nakaay-ayam ti Meralco Bolts player a ni Raymond Almazan iti labanda kontra Converge ti Philippine Basketball Association Philippine Cup.
Segun iti kampo ti player, daytoy ket kalpasan a nasuspende iti maysa nga ay-ayam gapu iti mapapati a pinasuksokan ti maysa a traffic enforcer ti Metropolitan Manila Development Authority (MMDA).
Malaksid iti daytoy, dinakamat ti PBA Uniform Players Contract a masapol nadalus ti naganda iti publiko gapu ta awitda ti Philippine Basketball Association.
Maipalagip nga inpalgak ti Metropolitan Manila Development Authority a mapapati a ginandat ni Almazan a pasuksokan ti traffic enforcer ti Metropolitan Manila Development Authority kalpasan a limmasat iti EDSA Bus Lane.
Kabayatanna, inlibak ti player ti nasao a banag kontra kenkuana ken kinunana a ti kuarta nga inyawat ti asawana ket dagus a pangbayad iti multa gapu iti panaglabsingna iti linteg ti trapiko.
