LAOAG CITY – Agtultuloy a maag-agasan iti Governor Roque Ablan Senior Memorial Hospital (GRASMH) ditoy ciudad ti Laoag ti maysa a lalaki gapu kadagiti sinagaba na a sugat kangrunaan na ti naiwa a muging na kalpasan a nadesgrasya ti inturong na a motorsiklo iti paset ti Barangay 54-B, Camanggaan ditoy ciudad.
Nabigbig daytoy a ni Jeramie Domingo y Basilio, agtawen ti 27, maysa a Merchandiser ken residente iti Barangay 8, Piddig, Ilocos Norte.
Iti imbestigasyon, napukawan ti kontrol ti motorsiklo ni Domingo gapu ti maipagarop a kinapaspas ti panagpataray na kabayatan ti panagpadaya na a direksyon.
Gapu iti daytoy, naidungpar ni Domingo iti nakaparking a motorsiklo a kukua ni Keano Ross Aglipay, taga Barangay 4 iti ili ti Sarrat a nangitunda ti pannakatulid na.
Naitaray iti nasao nga ospital ti biktima para iti pannakaagas na kangrunaan na ti naiwa a muging na.
Naamoan a ti biktima ket nakainom ti nasanger idi napasamak ti insidente.
