LAOAG CITY – Nauram ti merkado publiko iti ciudad ti Batac idi rabii, ken agpapan ita ket saan pay na naan-anay a nasebseban ti apoy no sadinno nga adda pay dagiti behikulo a nairamrama n a nauram.
Inbatad ni Fire Inspector Heinrich Gudoy, ti firemarshall iti Bureau of Fire Protection iti ciudad ti Batac, a saan da a dagus a nakapagresponde agsipud ta nagbiruk da paylaeng ti pangalaan da ti danom.
Inlawlawag na a pudno nga adda dagiti fire hydrantds iti ciudad ngem nakapuy ti pressure na.
Kuna na pay nga umabot iti 27 a firetrucks ti nagtitinnulong a nangsebseb ti apoy ngem agpapan ita ket adda paylaeng ti pasetna a saan a naan-anay a nasebseban.
Inpakaammo na a basar iti inisyal nga imbesttigasyon da ket rumrumuar a nangrugi ti apoy iti maikadwa a kadsaaran ti tiendaan partikular kadagiti panganan wenno karinderya.
Nupay kasta, saan pay a masinunuo no ania ti namonganayan ti napasamak nga uram.
Mainaig iti daytoy, kuna met ni Mayor Markee Chua iti ciudad ti Batac a saanna pay a masinunuo no pangalaan da ti pondo a maipaay ti tulong para kadagiti naapektaran iti napasamak nga uram.
Iti agdama, agtultuloy ti imbestigasyon ti Bureau of Fire Protection mainaig iti pannakauram ti merkado publiko iti ciudad ti Batac.
