LAOAG CITY – Naipilan kas regular filing ti reklamo a Republic Act (RA) 7610 wenno Child Abuse kontra ken ni Miss Devora Eclarin, School Supervisor iti Paoay Faith Academy iti ili ti Paoay gapu iti panangkeddel na ti namin-uppat a daras iti maysa nga estudyante na.
Daytoy ti kinumpirmaran Police Capt. Eddie Suyat, ti chief of police iti ili ti Paoay.
Segun ken ni Suyat, saanen a kinayat dagiti nagannak ti ubing ti nakisango ken nakisarita kenni Eclarin gapu ta kayat da nga iti korte ti pagsasangwan da.
Inbatad ni Suyat a ginandat ti mangisursuro a kasarita dagiti nagannak ti ubing tapno pagsasaritaan da ti napasamak ngem napaay daytoy.
Maipalagip a kineddel ni Eclarin ti adalan na gapu ta maipagarop a saan a makasursurot iti isursuro na ken makaturturog ti ubing.
