LAOAG CITY – Milagro nga awan ti nakana a sugat a pinasar ti maysa a mangisursuro kalpasan a nadesgrasya iti by-pass road bisinidad iti Barangay 45, Tanguid ditoy ciudad ti Laoag.
Nabigbig daytoy a ni Mr. Reginald Valencia, mangisursuro iti Ilocos Norte College of Arts and Trades (INCAT) ken residente iti Barangay 38-B, Mangato ditoy ciudad.
Iti imbestigasyon, kabayatan ti panagpapa-abagatan a direksyon ni Valencia a nakalugan ti SUV Montero na ket na-overshoot iti agkurba a paset ti kalsada isut gapuna a nadungpar na ti dua a barikada iti by-pass road a nagresulta ti pannakanatennag na iti baba nga abay ti irigasyon.
Gapu ti daytoy, arigna awan ti nagbalbalinan ti lugan gapu ta nakupkuppit ngem nagasat ti mangisursuro gapu ta saan unay a nakaro dagiti pinasar na a sugat.
Napaagasan ni Valencia iti Governor Roque Ablan Senior Memorial Hospital (GRASMH) ditoy ciudad.
Naamoan nga aggapo ni Valencia iti pasken ti nagretiro a pada na a mangisursuro isut gapuna a nakainom ti nasanger idi napasamak ti insidente.
