LAOAG CITY – Ar-aramiden amin ti Provincial Government babaen ti Metro Ilocos Norte Council a maiyalisto ti pannakaipaay ti tulong kadagiti amin a kameng ti Tricycle Operators and Drivers Association ditoy probinsia.
Paset daytoy iti kalikagum ni Gov. Cecilia Araneta Marcos a makatulong ti gobierno probinsial a mangalay-ay iti rigat nga ibakbaklay dagiti kameng ti TODA ken JODA ditoy probinsia gapu iti mapaspasaranda a rigat gubuay iti kinangina ti presio dagiti produkto a petrolyo.
Naammoan a dua manen nga ili dagiti nagturungan ti grupo ti gobernador para iti pannakaipaay ti tulong kadagiti kameng ti TODA iti ili ti Pinili ken Badoc.
Inpakaammona a ti 2, 500 a pisos ken foodpack ket tulong manipud iti gobierno probinsial.
Inlawlawagna a malaksid iti nasao a tulong ket maiyur-uray ti tulong nga ipaay ti gobierno nasional kangrunaanna ti manipud iti Department of Transportation ken iti Land Transportation Franchising and Regulatory Board.
Inpatalgedna nga ikarigatanda ken ni Vice Gov. Matthew Marcos Manotoc nga allukuyen ti gobierno nasional para iti pannakaipaay ti ad-adu a tulong kadakuada.
