LAOAG CITY – Kinontra ni Mexican President Claudia Sheinbaum ti inrakurak ni US President-elect Donald Trump a nagtulag da tapno mapasardeng ti migration iti beddeng ti Estados Unidos.
Iti post online ni Trump, inmanamong ni Sheinbaum a mapasardeng ti migration iti babaen ti Mexico ken iti Estados Unidos, ken mapaserraan ti Southern Border.
Ngem kinontra daytoy ni Sheinbaum ken inulitna a ti takder ti Mexico ket saan a mangiserra kadagiti beddeng, no di ket tapno tamingen ti panagakar bayat a raraemenna dagiti natauan a karbengan.
Maipalagip nga idi Nobiembre 25, inalarma ni Trump dagiti trading partners ti Estados Unidos bayat ti panangikarina inton agtakem inton Enero a mangpasardeng iti across-the-board tariff a 25% iti Mexico ken Canada, ken 10% a tariff iti China.
Kinunana a maikkat laeng ti import duties iti Mexico ken Canada apaman nga agsardeng ti illegal immigration ken drug trafficking iti US.
