LAOAG CITY – Inkari ti baro ken kaunaan a babai a Presidente iti Mexico a ni Claudia Sheinbaum a saanna a paayen dagiti umili a nagtalek ken nangsuporta kenkuana tapno agballigi iti kalepleppas nga eleksyon.
Sukatan ni Sheinbaum ti mentor na a ni outgoing President Andrés Manuel López Obrador mangrugi intono Oktubre primero ita a tawen.
Kalpasan a naamoan ti resulta ti botos ket dagus a nagtitipon dagiti supporters ni Sheinbaum iti Zocalo square iti Mexico City tapno selebraran ti panangabak na.
Iti panagbitla ni Sheinbaum, inbatad na nga iti kaunaan a gundaway kalpasan ti 200 a tawen ti Mexican Republic ket nagbalin isuna a kaunaan a presidente ti Mexico.
Kuna na a ti achievement ket saan laeng a para kenkuana no di ket para iti amin a babbai idiay Mexico, kagiddan ti panangikari na a saanna a paayen dagitoy.
Kagiddan iti daytoy, nagyaman met ni Sheinbaum iti kinalaban na a ni Gálvez gapu ta inawat na a dagus ti pannakaabak na.
Immuna iti daytoy, nakagun-od ni Sheinbaum ti 60 a porsiento a botos ken 30 a porsiento ti nangitarayan na iti napinget a kinalaban na a ni Xóchitl Gálvez, maysa a negosyante.
Ni Sheinbaum a dati nga Energy Scientist ket inkari nga nga itultuloy na dagiti narugyanen ni Obrador, kangrunaan na dagiti welfare programmes a naglatakan ti outgoing President.
Nagbalin pay ni Sheinbaum idi 2018 kas kaunaan a babai a mayor iti Mexico City agingga a bimmaba iti pwesto idi 2023 gapu iti panagpaidasig na a para presidente iti nadakamat a pagilian.
