LAOAG CITY – Linawlawagan ni Dr. Alfredo Domingo, ti Municipal Health Officer iti ili ti Paoay ti isyu seknan iti panagbakuna iti nasao nga ili.
Ummuna iti daytoy, adda ti dimmanon ditoy Bombo Radyo nga adda dagiti nagrehistro iti barangay para iti panagbakuna da ngem iti kaaldawan ti panagbakuna da ket maipagarop a madatawan ti proof of comorbidity kas iti reseta wenno medical certificate a mangipaneknek a ti maysa nga indibidual ket adda ti sakit na.
Basar pay iti impormasyon, no awan ti maipakita ket rumrumuar a saan da a mabakunaan.
Nupay kasta, kuna ni Dr. Domingo a sakbay pay ti panagbakuna ken ammo dagiti kapitan a dagiti eligible population ti agbakuna wenno dagiti mabakunaan ket dagiti Senior Citizens, OFW, Seafarers ken persons with comorbidities.
Segun kenkuana, dagiti comorbidity, masapol ti medical certificate wenno reseta tapno mangipaneknek nga adda ti sakit na.
Inpetteng na a narigat ita a makaala ti medical certificate ken mabalin nga awanen dagiti reseta isut gapo na a no awan dagitoy ket makaanayen a dagiti agas a tumtumaren ti maysa nga indibidual ti ipakita na tapno kwalipikado nga agbakuna.
Kunana a no awan ti naitugot nga agas ket mabalin met a paidanon da lattan dagitoy tapno masigurado met laeng a karaman dagitoy kadagiti addaan ti comorbidity.
Mainaig iti daytoy, inbatad ni Domingo a dagti laeng adda iti listaan ti kapitan ti mabakunaan iti dayta nga aldaw.
Inpalgak na a kalikagom da a suruten ti pagannurutan ken liklikan dagiti posible a rumsua a problema.
